☆皮皮的大個仔見證 ~

Lilypie Kids Birthday tickers

2015年2月26日星期四

女生愛自拍 - 自拍香水神器 SONY KW11 試機報告!

又來自我焚燒時間~

上回小妹向SONY PR借左部 SONY RX100 III 試機後自我中毒,最終自掏荷包買了部相機返來。。。

RX100 III畫質真係靚,機仔size 但高解像蔡司鏡難免令我這影相狂心動!!!

相關BLOG: 女生試用: 高階小相機@ SONY RX100 III


今回因為幫BLOG友借機,於是自己又借埋一份!「自拍神器」呢家野HIT左好耐,SONY 在2014年年尾出呢呢部「KW11」自拍神器,外形成個香水樽咁靚,仲有四種粉色機殻選擇,自拍靚樣當然sharp啦!現在的女生無時無刻都要自拍,最好即時post 埋上Facebook,KW11絕對設合愛拍照、愛sharing 的女生!


先睇下部機既靚樣先!

KW11細細部,女仔手一手可握!外形最特別是鏡頭位置,是透明水晶膠包住鏡頭,鏡頭隔離有2粒swarovski水晶,加上閃閃圓周包住個鏡頭位,一望就知望呢度影相啦!

鏡頭可以轉前面,望住MON自拍用;或者轉後面影景影食物,180度轉轉轉,相影乜都得啦!


機身得2粒掣:ON/OFF 及 影相掣 ;操作超級簡單方便!


機身細,memory card 要用迷你型的micro SD card~


開機看,哎呀!呢度又吸引我,版面設定係粉紅漸變粉紫色,女仔最中意呢D顏色!

KW11不難用,MENU裡面就係得呢幾個items較部機~

最勁可以wifi send相去手機,影完靚相即時post上網!

仲有係touch screen控制操作,唔洗左㩒又㩒,touch 一下可以自動對焦及影相,唔洗點用腦,影selfie 快靚正!



拍攝模式有四款,女生愛自拍當然選「美容效果」啦!入到去可選1-10度美肌及柔膚效果,我覺得各5度剛好,又夠靚又夠自然。




而且望住個MON自拍會自動「人面偵測」,你個樣打左soft咁,仲有2粒閃閃星框住你!


另外有場影選擇,不過我好少用呢D function....



相片效果可以玩下,影下小物出來效果幾得意!


好啦!試機相來了!~~~

這小熊日日陪住我返工架!平時唔知點影? 選「智慧式自動」便可以,拍出來跟物件原來接近,夠清晰~



再試玩下「相片效果」,我較喜歡普普風的filter,濃色一點,影公仔夠cute!


近距離影下小物,唇膏上的印花影得細緻,而且有前清後濛效果,突顯立體感。



試下影「美食mode」,三哥口水雞好好味呀!原來唔多辣~但夠濃味!想起都想吃!

影食物我覺得一般,在螢幕上看吸引些,但過了相冇咁sharp。


影下我既TOMICA車隊!我蠻喜歡以KW11近距離影小物,色澤夠濃,也很清晰細緻。


哈哈!點少得自拍呢???

影人樣真係特別sharp,而且比真人靚女好多!我用上了鮮色紅唇膏,妝感突出~

還可自動將我面上所有瑕疵、黑眼圈、暗瘡印自動淡化及遮蓋,唔洗化妝都有靚樣!

5度美肌效果恰好,少少膠面,但有粉嫩效果,超好氣息!

比「美圖獸獸」自然好多靚好多!



有一天我和皮皮去迪士尼拍拖,都帶著KW11不停自拍!

得我地2條友,邊個幫我地影相呢? 梗係用自拍神器啦!~~~



坐在迪士尼車廂手震震,都影到我地好sharp! 

日光下拍照膚色更柔和,而且我和皮皮都戴著帽子,理應眼下位置會暗色一點,但影出來樣子夠光猛,皮皮係咪好醒目先?


幫皮皮影下人+境相片~

都OK,日間去玩帶住KW11都夠影~


影下米奇米妮,迪士尼新春裝飾好有氣氛!

構圖很豐富,影出來唔算太sharp。


影人係好些的!美肌萬歲!

同皮皮在城堡前自拍啦!鏡頭夠wide,影人連景都得!但眼神望住個MON,唔中鏡,識影望返鏡頭靚D~


轉一轉鏡頭,影成日郁郁貢既皮皮,幸好KW11對焦尚算快,影小朋友夠定格~


到晚上我地睇夜光巡遊再自拍!


有驚喜!晚上唔夠光的環境下KW11識得自動調光,人樣同樣Sharp!


試下多些人一同合照啦!個個都美肌!梗係覺得美肌呢下野女人影好了,男人美肌樣好怪。。。

另外鏡頭超wide關係,唔洗自拍神棍,都可以影到勁多人合照,相信十幾個人都得!下次試下找大班人一齊自拍先!


小結:
SONY KW11 價錢比卡西歐部自拍神器便宜一大截,美肌效果好適合任何年齡女性,影人樣最Sharp!而且靚過真人無得頂!愛自拍女生必愛上!

機仔細細,女生放包包袋住出街周圍去周圍影都唔錯~普通影下小物和食物都夠影,風景就一般。

內置WIFI可以即時send相到手機,隨時upload上網效果比手機靚!

如果女友愛拍照,送這部給她一定滿分!好多女仔都想要~

daidai今次免中毒,因為我部RX100III啱我多些!


相機規格:


2015年2月25日星期三

日本金箔皂.男士保濕潔面新產品@Skin Advanced



來自日本的Skin Advanced 之前也用過其保濕產品,印象很討好,特別加入「白金納米粒子」及「阿爾卑斯山冰川水」,保濕力強!

加上獨有的「6+6-」配方,在產品加入6大天然成份,同時減去6種常見的人工添加劑及防腐劑,連敏感肌膚都適用。

最近Skin Advanced又有新產品,感謝公關送上產品給我和皮爸一齊試用!一齊把皮膚護理得乾乾淨淨!SO CLEAN!

左:Skin Advanced男士白金舒潤煥膚潔面乳 $89/100ml
右上:Skin Advanced全新白金舒潤瑩亮潔面皂$110/85g
右下:Skin Advanced白金舒潤水凝睡眠面膜$220/80g


先談潔面皂,真是不錯用!

Skin Advanced全新白金舒潤瑩亮潔面皂$110/85g




內藏大量金箔,閃閃生輝,金箔份量不比貴價金箔皂少,附上盛放潔面皂的小碟,非常方便!



我喜歡它加少許水便能搓出大量泡泡,泡泡很柔滑,易清洗,沖水不難,潑幾次水便能把皮膚沖乾淨。

金箔皂夠大塊,有排用,相信起碼可以用4個月,而且價錢不貴,很抵用。

添加金箔的潔面皂,洗後皮膚不繃緊,而且很乾淨清爽,能去除皮膚多餘污垢和油脂,用了蠻舒服。

洗後皮膚多添白晳亮澤感,很通爽啊!美白同時保濕,皮膚看起來也亮白一點。

除了洗面,我還用來洗澡,用來洗背部的粒粒蠻好的,清爽一點,老泥都少些!



Skin Advanced白金舒潤水凝睡眠面膜$220/80g

去年已用了一瓶,深層鎖水補濕,隔晚用便可。





一打開水凝睡眠面膜很有驚喜!整瓶有金光閃閃的,充滿著金箔,很有奢華感!

但這瓶價格大眾化的,所以很超值,效果也相當好,非常補水,每天早上醒來皮膚都很滑的!非常柔軟和充滿彈性〜!


塗開皮膚閃閃發亮的~ 質感柔軟易推,也很水滑滑的,不怕質地太笠,敷過夜皮膚也沒負擔。

再近看一點,看到金箔嗎?再塗到面上,充滿著自然光澤,好喜歡皮膚這種透亮感覺呢!

厚敷會見金箔在皮膚上,只要輕輕按摩便可把金箔溶化〜

我試過厚敷和薄敷,厚敷皮膚會濕潤一點,前陣子天氣太冷我會多厚敷一點,以防乾燥,雖然金箔會停留在皮膚上未即時溶化,但第二天起床皮膚會吸收哂,感覺水潤之餘也白淨一點,而且好柔軟好滑的,效果很不錯!

如果怕太濕潤或怕笠的朋友仔,可以選擇薄敷,可以透過按摩把金箔溶化在皮膚裡,能為肌膚補充水份,深層滋潤,也提亮膚色,帶來珠光透亮的效果,也很顯著!



最後一款是男士保濕系列:
Skin Advanced男士白金舒潤煥膚潔面乳 $89/100ml





男士潔面乳含蜂王漿蛋白,能減輕刮鬍後的敏感不適。


潔面乳的質感很柔軟細密,加水能搓出柔軟細密泡泡,味道很清淡,不刺鼻,男士不抗拒。

皮爸用後說:「幾好丫,冇乜問題,都幾乾淨丫~」

我再仔細看看,細密的潔面泡能有效潔淨毛孔污垢,用後皮膚清爽不繃緊。

簡單的清潔產品最啱男士用,只要乾淨俐略便可以了。



Skin Advanced 於屈臣氏獨家發售。




試用產品及產品說明由品牌提供。



2015年2月24日星期二

年初三。長洲食玩遊 - 鬆弛熊夾餅好得意呀!




承上回:^☆♪長洲櫻花盛放了!ʕ •ᴥ•ʔ

初三這天我們皮家與朋友仔到長洲玩!嘩!真係爆勁多人呀!

碼頭一帶海傍街,有好多街邊檔可以勁掃街,非常熱鬧!

就這樣開始我們的吃貨之旅了!



往長洲的大船坐滿人,阿皮滿心歡喜的準備落船啦!


一來到長洲,兩隻小鬼居然係食蝦條先。。。


我地在街邊買左5蚊3件煎釀三寶,粒炸魚肉好大舊,熱辣辣好新鮮!!!


之後去到長洲特有的鬆弛熊和Hello Kitty夾餅店!

Hello Kitty側邊有兩舊屎狀夾餅!哈哈,好過癮!


我和皮皮都是鬆弛熊fans,梗係食鬆馳熊夾餅啦!

皮皮就好中意食個邊,脆卜卜!成個熊樣好搞笑呀!




Hello Kitty夾餅淋左煉奶和花生醬後冇左Kitty個樣。。。

唔知係咪事頭婆,見我地拖住兩隻小鬼,就主動叫我地入去店裡坐住食,唔洗一路行一路滴汁~~~

幸好有位坐,小鬼門真係食得好攪搞。。。



既然坐底左,仲食埋呢度馳名小吃芝士焗帶子!

仲有焗蠔、焗龍蝦,由於坐住炭爐附近,真係熱爆!同時好香噴噴!

粒焗帶子上面有勁多烟肉洋蔥,熱辣辣,都幾好味架!


同一間店,食埋大大條薯片!

其實全長洲周圍都有薯片食,唔洗等!



同阿皮一齊食,所以只係落左紫菜粉,阿皮不停食食食,好味到仲想自己一個食哂!


比示下!邊個長D?!!!

即炸新鮮薯片真係好好味!脆卜卜,食到唔停得口!!!



海傍街太多人,於是走入內街逛逛,同出面完全兩個世界,好多店都沒有開檔~~~


上到山頂看櫻花,昨天那篇分享過了!

^☆♪長洲櫻花盛放了!ʕ •ᴥ•ʔ



妹妹話想去沙灘玩,所以下山去找找~


沙灘旁有個遊樂場,可以比小鬼們放下電~~


然後碌落沙灘玩~~~

執下貝殼@@一陣間小鬼們的鞋子充滿沙沙~

阿皮好想除鞋玩,但我地冇準備衣襪啊。。。下次夏天再來玩過啦!



回碼頭方向我買了馬碲糕和紅豆糕,但沒影相,原來冇人鐘意食,得我自己食。。。


經過這個彩色情人鎖欄網,好靚呀! 
love love <3 <3 <3



落到去又食,黎長洲點可以錯過大粒魚蛋呢?!


去到廣場位置,見到傳統手拉麥芽糖叔叔,好似尋晚「東張西望」訪問佢,全港都冇乜人整公仔麥芽糖了!

好多大人小朋友圍住,仲即時整吹波糖,我都好想吹呀!


衰豬阿皮睇中左個「五角龍」!其實係隻有角既豬,我都唔知咩動物黎。。。

在阿皮心中是恐龍一隻@@



唔知牛定豬定五角龍,五顏六色真係好靚,麥芽糖公仔$40,爸爸說有點貴,但之後覺得好值!



因為下午阿皮玩到好攰又眼訓,全靠呢支糖頂住,叫佢去東就東,去西就西,全程冇扭計,真乖仔!!!



經過甘永泰魚蛋店,哎呀~好多人,費事排隊。。。

因為諗住去允升甜品!芒果糯米馳好掛住你呀!!!



可是旺舖唔休做,允升初三冇開檔,初五先開呀,嗚嗚。。。


人太多怕冇船返香港,所以五點幾散水啦!

臨上船前在海傍街某店買左個芒果糯米馳,仲有大碌腸,皮皮食腸仔好yummy~

大人就一人一個糯米馳,好好味呀!今次阿囝冇同我爭食啦!糯米馳皮薄,入面成舊芒果,非常香甜,超正呀!!!

好想食多舊。。。

我仲未食夠。。。

長洲太多好野食,下次找次少人D 既時候來多次,我要大吃特吃!!!


相關BLOG:

LinkWithin

Related Posts with Thumbnails